PANAY, CAPIZ- Ginatun-an sang mga opisyales sang banwa sang Panay, Capiz, ang pagpaidalom sang ila nga banwa sa State of Calamity.
Sa interview sang Bombo Radyo kay Mayor Jonathan “Sonny” Besa, sang banwa sang Panay, iya ginpahayag nga sa ginpatigayon nila nga emergency meeting kaupon ang Pan-ay Municipal Disaster Risk Reduction and Management Council, nakasugtanan nila nga magdihon sang rekomendasyon para sa pagpaidalom sang bug-os nga banwa sa ‘State of Calamity.
Suno kay Mayor Besa, ang amo nga lihok ang ipalab-ot sa Sangguniang Bayan kag pagahulton nila ang desisyon.
Nahibaluan nga isa ang banwa sang Panay sa Capiz ang tuman nga naapektuhan sang malapnagon nga pagbaha nga dala sang Bagyo Ramil sa diin nga naglab-ot sa 9,803 ka pamilya ukon kabaylo sa 39, 361 ka mga indibiwal ang apektado.
Nagpasalig naman ang alkalde sa mga pumuluyo nga himuon sang ila nga talatapan ang tanan agud nga madul-ong ang nagakaigo nga bulig sa tagsa ka mga naapektuhan.
Interviewed by Bombo Francis Biñas
