ROXAS CITY, CAPIZ- Daku nga bulig agud makalikaw sa nagkalain-lain nga sahi sang mga balatian ang pagpanghugas sang kamot.
Sa interview sang Bombo Radyo kay Engineer Joemarie Eugene L. Gonzales, Sanitation Inspector IV sang Provincial Health Office, iya ginpahayag nga madamo sang benepisyo nga mahatag sa ikaayong-lawas ang pagpanghugas sang kamot.
Suno kay Gonzales, ang simple nga pagpanghugas sang kamot gamit ang sabon kag malimpyo nga tubig ang mahimo nga makabulig agud matapna ang paglapta sang mga sakit kaangay sang trangkaso, diarrhea, kag iban pa nga impeksyon nga tuga sang bacteria kag virus.
Pahayag nya, sa subong nga bulan sang Oktubre, ginaselebrar ang Global Handwashing Day sa diin nga katuyuan sang amo nga aktibidad nga maghatag sang ihibalo sa tagsa ka mga bata sa eskwelahan sa importansya sang pagpanghugas sang kamot.
Nagpahanumdom man ang natungdan nga ang insakto nga pagpanghugas sang kamot ang kinahanglan nga magdugay sang indi magnubo sa 20 segundos, ginasabunan ang tanan nga bahin sang kamot kalakip ang gilid sang mga kuramoy kag idalom sang mga kuko.
Interviewed by Bombo Jessa Mae Siman De Los Santos
