ROXAS CITY – Gindepensahan sang live-in partner sang isa sa duha ka lalaki nga nagpanglampos sang tubo sa 29 anyos nga mister sa Sitio Sakup, Barangay Culasi, Roxas City.
Suno kay Deditha Ave, self-defense lamang ang ginhimo ni Dexter Almorfe, 26 anyos kag Jupiter Portante, 45 anyos kay Mark John Rodrigo nga tuyo kuntani magbuno sa ila.
Ginpahayag sini nga halin sa ila trabaho si Almorfe kag Portante kag pauli na kuntani sang nakit-an si Rodrigo nga may bitbit nga hinganiban nga gamiton sa pagpangbuno.
Wala mabun-an ni Rodrigo ang duha apang bilang depensa, ginlampusan ini sang tubo sang duha.
Mahibaluan nga nag-angkon naman sang pilas sa ulo ang biktima nga gilayon gindala sa Roxas Memorial Provincial Hospital agud madapatan sang nagakaigo nga pagbulong.
Suno kay Ave nga may daan na nga hiligut-anon ang magtimbang nga kampo kag ginsakit na siya mismo ni Rodrigo.
Suno diri nga gintapakan siya sini kag gintuyo pa nga lampusan sang bato.
