ROXAS CITY – Nagpalab-ot sang reklamo ang isa ka concerned citizen sa Bombo Radyo natuhoy sa indi maayo nga pagsulundan ni Punong Barangay Ligaya Condez nga pagpanukot sang 30 pesos sa kada bulan sa mga residente sang Jumagicjic Ville, Barangay Jumagicjic, Roxas City.
Suno sa isa ka concerned citizen, nga ang pagpaamot sa ila sang 30 pesos kada bulan ang para sa mga barangay tanod nga nagabantay sa seguridad sang mga residente.
Sa matandaan sang mga residente nga bulan sang Oktubre 2018 sang nagsugod sila nga magbayad sang 30 pesos sa kada bulan.
Suno diri nga una nila nga nakasugtan nga boluntaryo lamang ang pagpaamot apang ginkakibot na gid lamang sang mga ini nga kun mapaslawan sila nga makabayad, naakig si Condez.
Nagalain pa ang buot sini bangud sang pagpabungad ni Condez sang mga malain nga tinaga sa iya sang napaslawan ini nga makabayad.
Nahibaluan nga kapin 500 ka mga residente ang nagabayad sang 30 pesos kada bulan kag kadam-an diri amo ang mga imol ukon wala sang ikasarang sa pagbayad.
Magluwas diri, ginpalab-ot man sang ginang ang pagpanukot sang 10 ka pesos sa tion nga magpick-up sang basura ang dumptruck sa Jumagicjic Ville.
