ROXAS CITY – Gin-ako ni anay DILG Secretary Mar Roxas nga may mga grupo nga nagaganyat sa iya nga magpanaug sa lokal nga lebel sa maabot nga 2019 election.
Sa isa ka press conference, ginpahayag ni Roxas nga ginapanumdum pa sini sa karon ang nangin proposal sang wala ginhingadlan nga grupo nga pagpapili sa lokal nga posisyon sa Capiz.
Wala man nalikawan sang anay sekretaryo nga mangin emosyunal sang liwat magpanumbalik sa iya kaisipan ang pagpalangga kag suporta nga ginhatag sang mga Capizeño sa iya nga pamilya humalin pa sang panahon sang iya nga lolo nga nangin presidente sang pilipinas, amay nga nangin Senador kag sa iya nga pagpapili bilang presidente sang pungsod.
Suno kay Roxas nga daku ang utang nga kabalaslan sang iya pamilya sa mga Capizeño rason nga bisan isa na ini ka pribado nga indibidwal, prayoridad sa gihapon sini ang mga taga Capiz sa ginaduso nga mga proyekto.
Isa sa mga ginaduso nga proyekto sang anay sekretaryo ang deworming sa diin 60 porsyento sa mga pre-school kag school aged children sa probinsiya ang bulate infested.
Pinaagi sa ini nga proyekto, mabuligan ang mga bata nga mangin bulate free kag healthy.
