Pagpirma ni Roxas City Mayor Ronnie Dadivas sang MOA sa tunga sang Roxas City Gov’t kag DPWH – 6, aprubado sa Sangguniang Panlungsod

ROXAS CITY – Ginkumpirmar sang Chairman sang Committee on Insfrastucture sang Sangguniang Panlungsod nga may permiso na si Roxas City Mayor Ronnie Dadivas nga magpirma sang Memorandum of Agreement (MOA) sa tunga sang Department of Public Works and Highways – Regional 6 (DPWH) kag sang Roxas City Government nahanungod sa plano nga pagpatindog sang dormitoryo sa mga frontliners sa Hortus Botanicos, Barangay Milibili, Roxas City.

Suno kay City Councilor Midelo Ocampo nga nagpatigayon sila sang Special Session may kaangtanan sa ginhinyo ni City Mayor Dadivas kag diri gilayon man nga nakasugtan nga hatagan sang permiso ang alkalde.

Suno kay Ocampo nga daku nga bagay ang pagpatindug sang dormitoryo sa mga frontliners nga nagatrabaho sa City Diagnostic and Laboratory Center sang syudad agud may yara sang madayunan ang mga ini.

Ginapahayag sang konsehal nga tuman ka budlay para sa mga nagatrabaho sa nasambit nga Laboratory Center nga magpauli adlaw-adlaw sa ila puluy-an ilabi na gid bangud sa tuman ka kritikal nga sitwasyon sang trabaho kapareho sang pag-test sang RTPCR Specimen.

Suno sa konsehal nga (16) ka mga units ang plano nga igatukod para sa mga frontliners.

Dugang pa sini nga ginadalian naman sa karon ang pagproseso sang mga dokyumento agud gilayon nga magamit ang ginaplano nga proyekto.

Base naman sa MOA, mahimo nga makuha sang DPWH ang nasambit nga dormitoryo sa tion nga magtakup ang COVID-19 Pandemic apang nagaplano ang City Government nga pagahinyuon nalang ini sa nasambit nga ahensya bangud sarang pa ini nga magamit sa iban nga mga importante nga kinahanglanon sa syudad.