ROXAS CITY – Naglala pa ang sitwasyon sang pagprotesta sang pumuluyo sa Sri Lanka matapos nakapalagyo ang ila presidente nga si Gotabaya Rajapaksa sa guwa sang pungsod.
Sa interview sang Bombo Radyo kay Mrs. Jovy Genite, Bombo International Correspondent sa pungsod Sri Lanka, ginpahayag sini nga na “trigger” ang pumulyo ilabi na sa Colombo bangud naisahan sila sang presidente nga nakapalagyo sakay sa military jet padulong sa pungsod Maldives.
Matandaan nga ginaekspektar sang residente sang pungsod Sri Lanka nga magresign kahapon nga adlaw si Rajapaksa apang natapos lamang ang adlaw nga wala ini nagpabatyag.
Mahibaluan nga gintal-usan sang prime minister subong si Rajapaksa bilang presidente kun sa diin ginkaingit pa sang pumuluyo bangud indi man sila pabor sa prime minister gani ginpromisa sang pumuluyo nga mas pasangkaron pa nila ang pagprotesta.
Bangud diri, nagdeklarar ang nagtal-os nga presidente sang state of emergency kag open fire sa kun sin-o man ang mangin bayolente.
Panugyan ni Genite sa mga himata nila sa Pilipinas nga indi magkabalaka bangud maayo ang ila kahimtangan bangud wala man sila nagapasilabot sa mga nagaprotesta.
Luyag man sini ipalab-ot sa Department of Foreign Affairs (DFA) nga nagalaum sila sa gihapon sang ginpromisa sang ahensya nga financial assistance nga daku ang mabulig sa ila galastusan.
