ROXAS CITY – Ginkompirmar ni City Disaster Risk Reduction and Management-Officer Dennis Saneo nga nagpakig-angut sa iya si Punong Barangay Jocelyn Asis natuhoy sa pag pull-out sa isa ka LSI nga nagabusong sa Roxas City School for Philippine Craftsmen sa Barangay Lanot, Roxas City.
Sa interview sang Bombo Radyo kay Saneo ginpahayag sini nga mahimo nga magpaidalom sa strict home quarantine ang isa ka LSI nga nagabusong kun wala sang sintomas sang COVID-19 nga nabatyagan sa iya nga lawas.
Magluwas diri, sarang man ini makapaidalom sa home quarantine kun makapasar ang puloy-an nga iya pagateniran sa mga gina-required nga standard sang Department of Health.
Dugang pa ni Saneo nga nakahibalo man ini nga wala pa nakapaidalom sa swab test ang nasambit nga LSI.
Mahibaluan nga ginpull-out ang ginang nga nagabusong sang 7 ka bulan sa nasambit nga quarantine facility matapos nga naghinyo ang bana sini nga didto na lang magpaidalom sang quarantine period sa balay sang ila tiyo sa Barangay Lawaan sining siyudad.
Ini matapos ang ila naeksperyensiyahan sa quarantine facility kun sa diin ginaalegar nakakita sila sang aswang sadtong Disyembre 25 sang gab-i.
Matandaan nga nagpakitluoy ang live-in partner sini nga lalake bangud indi sini luyag nga may yara sang malain nga matabo sa iya mag-iloy.
Bangud diri, ginpahanugotan ini ni Asis apang ulihi na sini natukiban nga indi residente sang Barangay Lawaan sining siyudad ang nasambit nga LSI.
