Lauman nga magataas ang kabug-usan nga transmission charges sini nga Abril bangud sang pagtaas sang ancillary services (AS) rates, suno sa National Grid Corporation of the Philippines (NGCP).
Yara sa PhP0.8094/kWh ang mga ancillary rates para sa Marso 2025 nga billing period nga pagasukton sang mga distribution utilities kag electric cooperatives sini nga Abril.
Mas mataas ini sang 16.05%, kun ipaanggid sa PhP0.6975/kWh nga ginasukot sang Pebrero 2025 nga billing period.
Ini nga kantidad nagalakip man sang ikatlo nga bahin sang 70% sang AS gikan sa reserve market sang Marso nga temporaryo nga ginsuspender sang Energy Regulatory Commission (ERC) ang pagsingil.
Ang ancillary service charges amo ang kantidad nga ginabayad para sa kuryente nga ginagamit sa pagbalanse sang grid sa tion sang indi balanse nga suplay kag demand. Ginkuha ini sa AS reserve market ukon sa mga power generator nga may direkta nga kontrata ang NGCP.
Bilang isa ka pass-through cost, ang mga generating companies, kag indi ang NGCP, ang makabenepisyo gikan sa pagtaas sang AS rates.
Nagtaas man sang gamay ang transmission wheeling rates ukon ang NGCP charge para sa basic service sa pagdeliver sang kuryente.
Ang mga transmission wheeling rates sa Marso 2025 billing period yara sa PhP0.5505/kWh halin sa PhP0.5252/kWh sang Pebrero.
Sa kabug-usan, yara sa PhP1.5240/kWh ang transmission charge para sa bulan sang Marso.
Mas mataas ini sang 11.51% ipaanggid sa PhP1.3668/kWh sa Pebrero nga billing period.
