Ginkumpirma ni anay City Councilor Powell del Rosario nga buwas nga adlaw ini maga-file sang Certificate of Candidacy (COC) sa pagka-vice mayor sa idalum sang PDP-Laban party kaupod si Rommel Lastimoso nga magapadalagan sa pagka-alkalde sang Roxas City kag ang napulo ka mga city councilors nga sanday Incumbent City Councilors Midelo Ocampo, Moreng Gonzaga, former City Councilor Joe Agdalipe, Lin Lin Lim kag Jennifer Anisco, Barangay Bato Barangay Captain Antonio Besana, Barangay Tiza Barangay Kapitan Alfredo ‘’Menong’’ Albaladejo, Earl Sicad, Rico Infante kag Rexam Laguda.
Ginpahayag ni del Rosario nga nag-upod ini sa partido sang gobernador bangud sa maayo nga handum para sa mga pumuluyo.
Nahibaluan man gikan kay del Rosario nga gintan-ay sini kay city councilor Jericho Celino ang pagpadalagan sa posisyon sa pagka-bise alkalde, bangud plano sini magpadalagan bilang board member apang sadto nga tion wala pa nakadesisyon ang pamilya Celino kag yara pa sila sa idalum sang Liberal Party.
Sang nagligad lamang nga Miyerkules si del Rosario nakadesisyon nga magapadalagan sa pagka-bise alkalde sa diin sang naplantsa naman ang ila linyada, nagpalab-ot na si Celino sang iya intensyon nga magpadalagan sa amo nga posisyon, apang ulihi na ang tanan.
Samtang kun matood nga ang iya mangin kasumpong sa pagka-bise alkalde amo ang iya pakaisa nga si Incumbent City councilo Trina Ignacio, ginarespeto niya ini bangud diretso ini sang bisan sin-o nga magpadalagan sa pinili-ay.
