ROXAS CITY, CAPIZ- Nagalaum ang transport group nga Bayan Panay nga mahangpan sang publiko ang ila pagahiwaton nga hublag-protesta sa Setyembre 18, kag 21, 2025 sa syudad sang Iloilo.
Sa interview sang Bombo Radyo kay Mr. Elmer Forro, Secretary General sang Bayan Panay, iya ginpahayag nga indi pwede nga ipabilin nalang sa kongreso kag senado ang isyu sang korapsyon bangud ang tagsa sa ila involved sa amo nga pagpangurakot.
Suno kay Forro, kinahanglan nga maghulag man ang mga pumuluyo kag ipanawagan ang tagsa ka mga hibubun-ot sini may kaangtanan sa amo nga korapsyon.
Dugang pa nya, kinahanglan man nga matumod kag makakas ang ugat sang korapsyon sa pungsod kag indi sang ‘band-aid solution’ agud nga mapaayo ang kabuhi sang mga pumuluyo.
Ang malapnagon nga pagpatigayon sang ‘Kahublagan kontra Korapsyon’ ang pagahiwaton sa Aganan Flyover, Pavia, Iloilo sa Setyembre 18 takna las kwatro sa hapon tubtob las sais sa gab-I kag magalibot naman ini halin sa Jaro Plaza padulong sa padulong sa Provincial Capitol sang Iloilo sa Setyembre 21 nga maga-umpisa takna las tres sa hapon tubtob las diyes sa gab-I bangud nga pagasundan ini sang ‘Konsyerto kontra Korapsyon’.
Pahayag pa sang natungdan, kuntani pamatian ang ila nga mga panawagan sa gobyerno nga magpanabat ang kinahanglan nga magpanabat sa korapsyon nga nagakahinabo sa pungsod.
Interviewed by Bombo Francis Biñas
