ROXAS CITY – Madinalag-on nga natapos ang una nga State of the Nation Address (SONA) ni President Ferdinand “Bongbong” Marcos nga nag-angkon man sang nagkalain- lain nga reaksyon.
Suno kay Michelle Bellonico, vendor sa Burgos Talipapa, kasadya ang iya nabatyagan sang nabatian sa radyo nga ginsiling ni PBMM nga wala na sang igapatuman pa nga lockdown sa pungsod.
Ginsiling sini nga kun matabo gidman, back to normal na sila sa pagbaligya kag indi na mangin limitado ang ila pagbaligya adlaw-adlaw, makabawi pa sila sa ila negosyo.
Matandaan gintuad ni Pres. Marcos sa iya nga SONA nga indi na sarang sang pungsod ang liwat nga paglockdown gani tinguhaan sini nga wala na sang igapatuman nga lockdown sa pumuluyo apang magapabilin sa gihapon ang alert level.
Sa pihak nga bahin, naglatag man sang pila ka mga proyekto kag programa ang presidente nga ginkasadya kag nangin kontento ang kalabanan sang nakabati sang iya SONA.
