ROXAS CITY, CAPIZ- Nagpahamtang ang Barangay Council sang Barangay Dayao, Roxas City, Capiz sa pagpanguna ni Punong Barangay Wenie Batuampo sang 22 tanan ka mga Closed-Circuit Television (CCTV) cameras sa ila nga palibot agud mas masiguro ang seguridad sang mga pumuluyo sa komunidad.
Sa interview sang Bombo Radyo kay Punong Barangay Batuampo, iya ginpahayag nga tinutuyo sang amo nga proyekto nga maghatag sang gilayon nga aksyon sa mga krimen kag mga insidente, subong man sang proteksyon para sa mga residente kag mga pampubliko nga lugar.
Suno kay Batuampo, nagapati siya nga ini ang isa ka dako nga bulig sa paglikaw sa krimen kag pag-secure sang mga pampubliko nga lugar.
Magluwas sa pagpabaskog sang seguridad, ang mga CCTV cameras mahimo man nga makabulig sa mas madasig nga imbestigasyon sang mga krimen. Nagahatag ini sang konkreto nga ebidensya para sa mga imbestigasyon kag nagaserbe nga deterrent para sa mga kriminal nga nagaplano magtago sa dulom. Makabulig man ini sa pagtumod sang mga aksidente ukon insidente sa dalan.
Subong man, kun wala suno sa iya sang CCTV, mas mabudlay ang pag-track sang mga krimen kag aksidente. Kun wala sini, posible nga magahinay ang mga imbestigasyon kag magahatag dalan sa pagdamo sang mga indi maaksyunan nga kaso rason nga importante ang pagsuporta sa kasubong sini nga proyekto agud mapaayo ang sistema sang seguridad sa barangay.
Pananglitan wala sang mga CCTV, may mga alternatibo man nga tikang nga mahimo, kasubong sang mas aktibo nga barangay tanod patrol, pagpalapnag sang mga safety campaigns, kag pagplano sang mga street light installations agud mas mangin safe ang kada kanto sang barangay.
With a report from Bombo Sunnie Mae Batencila
