ROXAS CITY – Personal nga nagpadulong sa waragwagan sang Bombo Radyo si Mrs. Sally Batugal agud ipa-bombo ang ginapahayag palpak nga road project sang Department of Public Works and Highways (DPWH) 1st Engineering District sa San Diego St. Barangay Hipona Pontevedra, Capiz.
Suno kay Batugal, daw kaangay wala gintun-an sang maayo ang proyekto bangud indi ini balanse rason agud magtinir ang tubig kag magresulta sa pagbaha ilabi na sa atubang mismo sang iya panimalay.
Pahayag sini, madugay na ini nga ginareklamo ang pagbaha kag gindangop sa Barangay Council apang ang aksyon lamang nga ginhimo sang council amu ang pagpahamtang sang latayan nga magakonekta sa karsada.
Gintuad pa ni Batugal nga mas maayo kuntani kun nagpahamtang ang ahensya sang drainage agud indi magtinir ang tubig.
Nagalaum si Batugal nga ma-aksyonan gilayon ini sang natungdan nga ahensya ilabi na nga nagatuga ini sang huol kag perwisyo sa mga pumuluyo kag nagahilapit na ang ila kapistahan.
