ROXAS CITY, CAPIZ – Kasubo ang nabatyagan sang pamilya Roxas kag sang mga taga-Capiz sa kamatayon ni Judy Araneta-Roxas, asawa ni anay Senador Gerry Roxas kag iloy ni anay Senador kag DILG Secretary Manuel “Mar” Roxas.
Nagtaliwan si Judy Araneta-Roxas sini nga Martes, Agosto 26, sa edad nga 91-anyos.
Ginkumpirma ang pagkamatay sang Roxas matriarch sang iya anak nga si anay Senador Mar Roxas sa isa ka social media post kagab-i.
Sa interview sang Bombo Radyo Roxas kay Annie Villaruz, anay Executive Director sang Gerry Roxas Foundation, iya ginhanduraw kun ano kaayo nga lider kag abyan si Judy.
Nagsugod ang mga proyekto sang pamilya Roxas para sa mga kabataan nga iskolar sang 1987, kun sa diin si Judy Araneta-Roxas ang nagserbe nga inspirasyon ilabi na gid sa mga taga-Capiz.
Kilala siya indi lamang bilang iloy sang panimalay sang mga Roxas, kundi bilang isa sa padayon nga nagasuporta sang mga programa sang Gerry Roxas Foundation, nga ang tuyo amo ang pagbulig sa mga imol nga kabataan.
Sang ulihi, naglapad ang iya nga sakop pinaagi sa pagbukas sang Gerry Roxas Leadership Awards para sa mga pinasahi nga estudyante sa bilog nga pungsod.
Sa bahin sang pulitika, ginalaragway si Judy bilang isa ka iloy kag abyan, indi lamang sang mga daku nga ngalan kundi hasta man sang mga gamay nga empleyado kag aide, nga iya ginapakitaan sang pagpalangga.
Nakaluwas si Judy Araneta-Roxas sa Plaza Miranda bombing sang 1971 upod ang iya bana.
Sa pihak sini, wala siya nag-untat sa paghatag sang suporta sa ila mga kaalyado sa pulitika, ilabi na gid sa iya probinsya nga Capiz.
Ginbilin niya ang iya mga anak nga sanday Mar Roxas kag Ria Roxas-Ojeda, upod ang iya mga apo.
