ROXAS CITY – Kumbensido ang pamilya sang 50-anyos nga lalaki nga nasapwan-patay sa Barangay Mianay, banwa sang Sigma nga wala sang foul play nga natabo sa amo nga aksidente.
Nagapati ang mga ini nga posible wala sini nadiparahan ang buho bangud yara ini sa impluwensya sang makahulubog nga ilimnon.
Matandaan nga ginkilala ang biktima kay Norberto Olano Villaruel, residente sang Brgy. Majanlud banwa sang Sapian.
Ginpahayag nga ulihe nga nakit-an ang biktima takna 8:00 sang gab-I kaupod ang mga abyan nga naga-inom sa nasambit nga lugar.
Nasapwan na lamang ang bangkay sang biktima alas 6:00 sang aga, Mayo 14 nga nagatuwad na sa buho nga may kadalumon nga 7 ka tapak sa higad sang feeder road.
Samtang, natigayon naman ang post-mortem examination kag yara na sa isa ka punerarya ang bangkay sang biktima.
