ROXAS CITY – Ginkakibot sang pamilya Delgado ang masubo nga natabo sa ila himata nga si Reynaldo kag asawa sini nga si Fe Delgado matapos pareho nga ginpangluthang-patay sa sulod mismo sang ila puluy-an sa Sitio Hacienda, Barangay Sublangon, Pontevedra.
Sa interview sang Bombo Radyo kay Rosemarie Delgado, utod sang biktima nga si Reynaldo, suno diri mahipuson kag mabuot ang iya utod gani dako nalang ang ila pagkakibot kag kasubo sa natabo nga krimen.
Suno kay Rosemarie, wala may ginsugid nga kontra ukon problema ang ila himata kun magbisita ini sa ila sa Barangay Tabuc Sur, Panitan.
Mahibaluan tumandok si Reynaldo sang Barangay Tabuc Sur samtang iya asawa naman ang taga-Iloilo kag kapin lima katuig pa lamang nagapuyo sa Brgy. Sublangon.
Ginpahayag isa ka mangunguma kag nagahupot sang kasapatan si Reynaldo samtang Barangay volunteer naman si Fe.
Ginsiling ni Rosemarie nga suno sa 7 katuig nga bata sang mag-asawa nga duwa ka persona ang iya nakit-an nga nagsulod sa ila puluy-an kun sa diin nakasuksok ang mga ini sang jacket kag bonet rason nga indi makilan-an.
Dugang diri nga natigayon pa makaguwa sa ila balay si Reynaldo matapos ginluthang kag didto gintodas sang mga suspek.
Samtang ang iya naman asawa nga si Fe ang nakadalagan pa kag nakapangayo sang bulig sa kalapit balay kaupod ang iya bata apang wala gilayon nagguwa ang kalapit bangud sa kahadlok nga madalahig.
Matapos ang lima ka minutos, nagguwa ang mga ini sa ila balay kag didto nasaksihan nga wala na sang kabuhi si Reynaldo samtang natigayon naman nga nadala si Fe sa ospital apang wala na ini natabangan kag ginbawian man sang kabuhi.
Sa pihak nga bahin suno naman sa pila ka mga residente sang Barangay Sublangon masami nagadala sang armas-luthang kag nagapamahog si Reynaldo.
Nagapadayon pa ang imbestigasyon sang kapulisan angut sa krimen kag pagkakilanlan sang mga suspetsado.
