ROXAS CITY – Aminado ang pamunuan sang intelligence unit sang Capiz Police Provincial Office (CPPO) sa madata nga operasyon sang illegal numbers game ukon bookies sa probinsya sang Capiz.
Suno kay Police Lieutenant Colonel Julius Balano nga nakalab-ot na sa iya ang impormasyon nga may nagalapta nga nagapataya sang bookies sa probinsya apang wala naman sang nadakpan ang mga kapulisan nga nagapatigayon sang bookies operation.
Ginpahayag naman ni Balano nga magapatigayon sila sang imbestigasyon natuhoy diri sa diin sang damlag lang nakabaton sila sang impormasyon sa diin nadalahig pa ang pangalan ni Police Colonel Canilo Fuentes ang Provincial Director sang Capiz-PPO.
Ginpanginwala naman ni Balano ang alegasyon natuhoy kay Fuentes bangud nagapati ini nga hugot ang pagdumili sini sa illegal gambling sa probinsya.
Mahibaluan nga ginganyat ni Balano ang publiko nga gilayon magpalab-ot sang impormasyon sa ila talapatan ukon sa mga kapulisan sa tion nga may ma-monitor nga nagapataya sang bookies sa mga kabanwahanan agud gilayon ini nga madakpan.
