ROXAS CITY – Posible nga isa lang ka persona ukon grupo ang may kahimuan sang asud-asod nga pagpanghold-up sa syudad sang Roxas.
Ini ang ginpahayag ni PLt.Col. Aron Palomo, hepe sang Roxas Component City Police Station, sang mainterview sang Bombo Radyo.
Suno diri, pareho nga pagpangsabnit sang cellphone kadungan sang pagdeklarar nga ‘holdap’ ang ginahimo sang mga persona nga nagasakay sa itom nga motorsiklo, kag nagasuksok sang kalo kag jacket nga nagaduag man itom.
Matandaan nga nagluntad ang pagpanghold-up sa dis-oras sang kaaganhon kag kagab-ihon sa Magallanes St., kag sa Legazpi St., sang damlag lang, kun sa diin nakuha ang cellphone kag kuwarta sang mga biktima.
Dugang pa ni Palomo nga may posibilidad man nga may ‘spotter’ ang mga suspek, ini bangud ginapahalin lang nila ang presensiya sang mga kapulisan sa isa ka lugar antes magpangbiktima.
Padayon sa karon ang ginapatigayon nga imbestigasyon sang mga kapulisan agud madakpan ang mga holdaper sa syudad.
Mensahe sang nasambit nga hepe sa mga pumuluyo nga likawan ang paglagaw-lagaw sa dis-oras sang kagab-ihon kag kaaganhon, ilabi na ang paggamit sang gadget sa mga madulom nga lugar.
