ROXAS CITY – Pormal nga magabukas sa Oktubre 25, 2019, Biyernes nga adlaw, ang sikat nga Christmas village sa banwa sang Panay, Capiz.
Ini ang ginpahayag ni Panay Mayor Felipe Barredo sang mainterview sang Bombo Radyo.
Suno kay Barredo nga temprano nga magabukas ang christmas village sang banwa subong nga tuig agud mahatagan sang kahigayunan ang mga Capizeño nga mabisita ang nasambit nga lugar.
Magluwas nga makahatag sang kalingawan sa mga bisita ang christmas village makabulig man ini sa mga vendors nga kabahin sang sustainable livelihood program sang banwa para sa ila palangabuhian.
Nagahinyo ang alkalde sa publiko nga updan ini sa pag-countdown para sa pagbukas sang Christmas village nga pagasundan sang fireworks display.
Ginpahayag pa sini nga may yara man sila sang ginpreparar nga mga pagkaon para sa halangdon nga mga bisita kag may ginabaligya man nga mga seafoods nga ginapabugal sang banwa kapareho sang scallops, alimango, lukon kag iban pa.
Sa sini nga tuig suno sa alkalde ginpainan niya ini sang mas o menus P1 million kun sa diin ginkuha ang pondo sa idalom sang development fund.
Mahibaluan nga ini ang tuigan na nga ginapatigayon sang banwa nga ginadugukan indi lamang sang mga Capizeño kundi mangin sang mga turista gikan sa iban nga kaprobinsiyahanan kag dumuluong.
