ROXAS CITY – Ginpamalabagan ni Panay Mayor Felipe Barredo ang plano sang Sangguniang Bayan (SB) members sang banwa nga pagpatigayon sang Executive Legislative Agenda (ELA) sa siyudad sang Iloilo.
Ini ang direkta nga gin-aku sang alkalde sang mainterview sang Bombo Radyo.
Suno kay Barredo nga nakibot siya sang gintundaan sang mga SB members nga didto nila hiwaton sa Iloilo City ang nasambit nga aktibidad.
Ginpahayag sang alkalde nga wala siya ginkonsulta natuhoy diri kag nakapa-reserve na sang venue para sa amo nga aktibidad antes siya ginhambalan.
Kuntani suno sa alkalde ginkonsulta anay ini natuhoy sa plano sang Sangguniang Bayan bilang pagpakita man sang kurtosiya sa iya bilang alkalde.
Apisar may reservation na para sa amo nga aktibidad, nagpanindugan si Barredo sa pagpamalabag sini nga hiwaton ang ELA sa siyudad sang Iloilo.
Suno diri nga indi sang praktikal kun sa luwas sang probinsiya pa ini hiwaton bangud madamo pa sang mas maayo nga proyekto kag programa nga dapat gastusan ang banwa.
Gindugang pa sang alkalde nga mas maayo kun sa banwa sang Panay lamang hiwaton ang ELA agud ang tanan nga empleyado sang lokal nga gobyerno sang banwa ang mahimo man magpakigbahin.
