ROXAS CITY, CAPIZ- Ginsuhestyon sang alkalde sang banwa sang Panay, Capiz nga kun mahimo ilisan ang pangalan sang Roxas Memorial Provincial Hospital sa pangalan nga Capiz Medical Hospital nga nahamtang sa Barangay Lanot, Roxas City, Capiz.
Sa interview sang Bombo Radyo kay Mayor Jonathan ‘Sonny’ Besa, iya ginpahayag nga para sa inclusivity kag kaangay mabatyagan gid nga iya ini sang tagsa ka mga Capiznon, mas manami ini nga tawagon sa amo nga pangalan.
Suno kay Besa, ang suhestyon ang kasunod sang pagsiling sang pamunuan sang ospital nga magakuha ini sang panibag-o nga lisensya sa ginpatigayon nga public hearing sang damlag lang sa Provincial Capitol.
Pahayag niya, suhestyon lang man ang iya nga ginhimo kag pamatian man ukon indi, bilog man gyapon ang iya nga pagbaton sa desisyon kag pagsuporta sa pagpaayo sini.
Nahibaluan nga ang Roxas Memorial Provincial Hospital-Lanot, ang isa sa mga proyekto nga nadala sa plano nga P1 billion loan sa Land Bank of the Phililippines sang gobyerno probinsyal.
Nagpalab-ot naman sang bug-os nga suporta ang natungdan para sa amo nga proyekto kag ginpasalamatan ang gobernador sa amo nga lihok bangud nga ang ginpahayag niya nga plano anay sang gobernador, amat-amat na nga nagatindog kag nagalab-ot sa kamatuuran.
Interviewed by Bombo Sunnie Mae Constantino Batencila
