ROXAS CITY – Gina-imbestigahan na sang National Bureau of Investigation (NBI) – Capiz ang panibag-o nga double your money investment scheme nga tuyo magsulod sa probinsya agud mangbiktima.
Ini ang ginkumpirmar ni Agent John Katipunan, Deputy Executive Director snag NBI- Capiz, sang mainterview sang Bombo Radyo.
Suno kay Katipunan, natigayon nga na-monitor sang intelligence operative ang hulag sang Nong Ye aka Henry Tan kag na-verify nga naga-operate sa Estancia, Iloilo.
Ang Nong Ye ang isa ka double your money investment scheme nga nagikan sa Cebu City kun sa diin agud makaginansya, pagadoblehon sini ang kwarta nga imo gin-invest kaangay sang modus operandi sang Chiyuto Creative Wealth Document Facilitation Service (CCWDFS) nga ginapanag-iyahan ni Patroceño Don Chiyuto.
Ginsiling ni Katipunan nga target sang nasambit nga scheme nga magsulod sa Capiz nga ginakabig Investment Scam Capital of the Philippines.
Apang indi luyag sini nga madamo naman nga mga Capiznon ang mabiktima sang pangtunto, samtang wala pa nagasulod kinahanglan na nga tapnaon ang iligal nga aktibidad.
Natalana nga magareport ang NBI-Capiz sa Regional Office agud maaksyunan gilayon ang nasambit nga investment scheme.
