PANITAN, CAPIZ – Nagapadayon sa gihapon ang imbestigasyon sang Panitan Municipal Police Station may kaangtanan sa natabo sa isa ka Ginang nga nabiktima sang ginapahayag tatlo ka mga babaye nga nagpakuno-kuno nga manugbaligya sang bluetooth speaker kag solar light sa Barangay Agluway, Panitan, Capiz.
Sa interview sang Bombo Radyo kay PSSG Daniel Gallano, imbestigador sang Panitan PNP, sang na-monitor sang ila Cybercrime Unit sa social media ang natabo gilayon nga ginpadulungan kag gin-follow up sang kapulisan ang insidente sa nasambit nga lugar.
Pahayag pa ni Gallano nga sa ila pagpangusisa wala na nagpa-record sa Barangay Agluway kag sa ila talatapan ang Ginang nga nabiktima sang tatlo ka babaye nga ginapahayag mga kawatan.
Matandaan nga suno sa panaysayon sang Ginang nga si Nanay Inday, nagpadulong sa ila balay ang tatlo ka mga suspek kag nagtan-ay sang bluetooth speaker kag solar light kabaylo sang mga butang kasubong sang alahas, cellphone nga guba kag iban pa nga pagkabutang.
Wala naman sang pagpangduha-duha kag gintanyag man ni Nanay Inday ang pendant sang kulintas nga iya lang man nakita kabaylo sa ginabaligya sang mga suspek, apang sa amo nga tion lamang ini nakahibalo nga may kabaylo nga kantidad ang iya pendant kun iprenda.
Bangud sini, nagpamalibad ang Ginang nga ibaylo ang pendant bangud wala pa nakahibalo ang iya nga bana apang nagapamilit ang mga suspek. Diri kag naglakat si Nanay Inday agud kuntani nga kadtuan ang iya nga bana apang sa iya nga pagbalik natalupangdan nalang sini nga wala na ang iya nga wallet nga natungtong sa altar nga may sulod nga kulintas kag ang pendant.
Ginatinguhaan pa suno nila nga lagson kag pangitaon ang mga suspek nga naglakat palayo sa lugar sakay sa motorsiklo apang wala na nila ini naabtan pa.
Ginakabig naman sang Panitan PNP nga isolated case ang natabo kag nagpanugyan ini sa publiko nga mangin alerto sa tanan nga oras kag i-secure ang puluy-an kun maglakat ukon wala sang tawo ang balay.
