Padayon nga gina-ayam sang katapo sang Panitan Municipal Police Station, ang suspek nga nagbuno patay sa kaupod sini sa ilimnan sa Barangay Banggaan, Panitan Capiz.
Sa interview sang Bombo Radyo kay PSSg. Daniel Morris Gallan, ginpahayag sini nga ang biktima ang nagapang-edaron sang 40-anyos kag residente sang Barangay Balantucan samtang ang ginatudlo suspek amu ang isa ka 50-anyos kag residente naman sang Barangay Banggaan sa amu man nga banwa.
Suno kay PSSg. Gallan, sang natabo ang insidente nagaselebrar sang kaadlawan ang suspek kag naga-inum-inum kaupod ang biktima.
Apang sa wala mahibaluan nga rason, hinali lamang sini nga gindusak sang buno ang biktima nga naigo sa nagkalain-lain nga parte sang lawas.
Mahibaluan nga base sa inisyal nga impormasyon nag-angkon sang 13 ka buno ang biktima kabangdanan sang iya gulpi nga kamatayon.
Gintinguhaan pa nga ipadangat sa Roxas Memorial Provincial Hospital ang biktima para kuntani sa nagakaigo nga pagbulong apang gindeklarar ini nga dead on arrival sang doctor.
Sa karun, desidido nga magpasaka sang nagakaigo nga kaso ang pamilya sang biktima batuk sa nasambit nga suspetsado.
