ROXAS CITY – Hugot nga ginpanginwala ni Punong Barangay Holse Bialen sang Barangay VIII nga indi siya ang nagagamit sang facebook account nga nagapangayo sang gcash number kag nagapanghulam sang dagko nga kantidad sa iya mga kakilala.
Sa interview sang Bombo Radyo kay PB Bialen, ginpahayag sini nga sang nagtuhaw ang amu nga mga mensahe gilayon siya nga ginpahibalo kag ginkumpirmar sang iya mga kaupdanan kag mga abyan kung matuod nga siya ang nagagamit sang amu nga account.
Mahibaluan nga naglab-ot sa 6 ka mga indibidwal ang ginpadal-an sang mensahe sang wala pa matumod nga persona kung sa diin nagapakilala nga si PB Bialen kag nagahinyo nga kung mahimo ini makahulam sang kwarta.
Butang nga ginklaro sang Punong Barangay nga wala ini sang kamatuuran ang tanan nga nagalapta online.
Suno diri, kalain lamang para sa iya nga ginagamit ang iya pangalan sa kalainan nga mga bagay.
Samtang, nagalaum ang Punong Barangay nga maga-abot ang tion madakpan kag matumod ang yara sa likod sini bangud dako ang iya pagpati nga isa lamang ang may kahimuan sini.
Mensahe ni Bialen sa iya nasakupan nga mangin aligmat kag indi basta-basta magpati sa mga nababaton nga mensahe ilabi na nagikan sa amu nga account.
