ROXAS CITY – Ginkumpirmar ni Punong Barangay Anita Bitoon sang Barangay Tanque nga indi mga residente sang ila lugar ang tatlo ka mga indibidwal nga nadakpan sa ginpatigayon nga drug buybust operation sa Burgos St., Barangay Tanque, Roxas City.
Matandaan nga ginakilala ang mga nagkaladakpan nga sanday alyas “Rogel”, 40-anyos, technician, kag residente sang Barangay Banica apang temporaryo nga nagapuyo sa nasambit nga lugar, alyas “Daryl”, 29-anyos, kag alyas “Paulo”, 29-anyos lunsay mga residente sang Barangay Tanza sining syudad.
Sa interview sang Bombo Radyo kay PB Bitoon, ginpahayag sini nga antes paman natabo ang insidente makabig na nga problema sa ila barangay ang amu nga mga indibidwal bangud sa illegal nga aktibidad.
Mahibaluan nga nakuha sa posesyon sang mga nagkaladakpan ang 11 tanan ka sachets sang ginapatihan shabu kung sa diin 1 diri ang nabakal, P500.00 nga buybust money sa nagkalain-lain nga denominasyon, coin purse nagaduag brown, aluminium foil, kag lighter.
Dugang pa diri nga natigayon nga madakpan ang nasambit nga mga persona pinaagi sa isa ka pulis nga nagpakuno-kuno poseur buyer kag pinaagi man sa gintingub nga pwersa sang Philippine Drug Enforcement Agency (PDEA) Capiz, kag Roxas City PNP.
Bangud sini, ginpasiguro sang Punong Barangay nga mas pasangkaron pa nila ang pila ka mga tikang nga ila kinahanglan ipatuman sa barangay agud indi na masundan pa ang liwat nga pagduging sang mga illegal nga aktibidad sa ila lugar.
