Bukas ang Pilipinas sa anuman nga suhestyon, proposal, ukon ideya nga magahalin sa Amerika agud labi pa nga mapaayo ang sitwasyon sang pungsod sa tunga sang nagkalain-lain nga pagpanghangkat nga gina-atubang sini.
Ini ang pahayag sang Presidente kadungan sang courtesy call sa iya sang US Senate Armed Services Committee Congressional delegates sa Malacañang.
Suno sa Presidente, madamo sang mga butang nga mahimo sang US kag Pilipinas nga magkaupod, kaangay sang may kaangtanan sa multilateral agreements nga natukod na sa rehiyon.
Ginsiling sang Presidente nga madamo pa ang dapat istoryahan sa tunga sang Pilipinas kag Amerika, nga ginpasalamatan man sang Chief Executive sa suporta nga ginahatag man sini sa modernisasyon sang AFP.
Sa atubang sini, nagpabutyag man si Presidente Marcos sang paglaum nga ang Pilipinas kag US mangin labi pa nga mag-alalangay sa palaabuton, ilabi na nga sa sulod sang nagligad nga siglo, ang duha ka pungsod may suod nga relasyon.
