CAPIZ – Gin-ako Philippine Coast Guard Capiz nga nangin mabudlay ang ila pagpatigayon sang rescue operations sa mga biktima sang baha sa probinsya sang Sabado, Oktubre 18.
Sang amo nga petsa, nagluntad ang malapnagon nga baha sa bilog nga probinsya sang Capiz sa diin pila ka mga lugar ang naka-eksperyensya sang lapaw-tawo nga lebel sang baha.
Sa interview sang Bombo Radyo kay Senior Chief Petty Officer Arnel Nisola, Chief Master at Arms sang Philippine Coast Guard-Capiz, iya ginpahayag nga gab-i na sang Sabado sang madamo nga mga bulig ang nagpangayo apang nangin pagpanghangkat ini sa mga personnel sang PCG bangud madulom kag tuman ka baskog sang ulan.
Suno kay Nisola, kulang ang mobilities sang Philippine Coast Guard kaangay na lang sang mga gamit nga kinahanglanon sa pagresponde.
Apang wala diri nagakatapos ang trabaho sang talatapan bangud ginahimo sang PCG ang tanan nga ikasarang sa pagbulig sa mga Capizeño.
Sa subong, normal ang operasyon sang sakayang pandagat sa Capiz kag wala man ini ginkansela humalin sang Sabado bangud wala man napaidalom sa Tropical Cyclone Wind Signal ang probinsya.
