ROXAS CITY, CAPIZ – Nangin malinong ang mga pantalan kag mga beach resorts sa probinsya sa tion sang bilog nga semana nga pag-obserbar sang Holy Week suno sa assessment sang Philippine Coast Guard-Capiz.
Sa interview sang Bombo Radyo kay PCG-Capiz Acting Commander Richard Gura, ginkalipay sini ang kooperasyon sang mga pasahero kag mga pumuluyo nga nagpadulong sa mga baybayon ilabi na sang Easter Sunday.
Dugang pa sini nga wala sang mga major incidents nga nabalhag sa probinsya sa tion sang Holy Week magluwas sa isa ka lalaki nga nalumos sa banwa sang Ivisan bangud yara ini sa impluwensya sang makahulubog nga ilimnon.
Mahibaluan suno kay Gura nga naka-heightened alert ang PCG-Capiz halin Abril 13 tubtob 20 kun sa diin may gin-deploy ini nga 120 ka mga personel kag 85% diri ang gin-deploy sa mga pantalan kag beach resorts.
Panugyan sini sa mga pumuluyo nga ipadayon lang ang kooperasyon sa tanan nga oras apisar wala sang okasyon agud mapabilin ang kalinong sa probinsya.
