-- ADVERTISEMENT --

ROXAS CITY, CAPIZ – Ginpasiguro sang Philippine Coast Guard-Capiz nga naka-alerto sila kag aktibo nga nagabantay sa mga baybayon kag sa lakat sang panahon para sa safety sang publiko, ilabi na nga duha ka Low Pressure Area (LPA) ang ginabantayan sa karon sang PAGASA, kag isa diri ang posible nga mangin bagyo.

Sa interview sang Bombo Radyo Roxas kay Arnel Nisola, Chief Master at Arms sang PCG-Capiz, sa subong normal na ang operasyon sang byahe sang mga sakayan pandagat matapos ang pila ka adlaw nga naeksperyensyahan nga mabunok nga ulan sa probinsya sang nagligad nga semana.

Suno kay Nisola, wala man sang nabalhag nga insidente sa kadagatan sa pihak sang malain nga tyempo sang tinalikdan nga semana.

Panugyan naman sini sa mga mangingisda nga pirmi maghalong kag mag-monitor sang lakat sang panahon. Kinahanglan man tsekyaron ang kondisyon sang ila mga sakayan antes magpalawod kag magpahigad gilayon kun maglain ang panahon agud malikawan ang disgrasya.

Dugang pa sang natungdan nga may mga ginapatuman nga safety guidelines ang Philippine Coast Guard sa diin nakadepende sa storm signal warnings nga ginapaguwa sang PAGASA, agud masiguro ang seguridad sang tanan.

-- ADVERTISEMENT --

– Interviewed by: Bombo Jessa Mae Siman De Los Santos