ROXAS CITY – Naka-alerto ang katapo sang Philippine Coast Guard (PCG) – Capiz, kadungan sang natabo nga oil spill sa Oriental Mindoro, nga naglapta na sa Semirara island nga sakup sang Caluya, Antique.
Sa interview sang Bombo Radyo kay Coast Guard Senior Chief Petty Officer Arnel Nisola, Deputy Commander for Operations sang PCG-Capiz, ginsiling sini nga ginpatawag na ang mga ini sa PCG agud magplastar sang mga tikang nga pagabuhaton sa tion sang wala ginapangayo nga hitabo.
Suno man diri nga wala nila ginlauman nga makalab-ot sa kadagatan nga sakup sang Antique ang amu nga oil spill, kag kuntani indi na magbag-o ang direksyon sang hangin agud indi na diri makalab-ot sa kadagatan sang Capiz.
Sa karon, bilang parte sang ila ginahimo nga tikang, ginasaka nila ang nagadungka nga mga barko sa pantalan kag ginapanugyanan ang kapitan nga magmonitor sa ila ginaagyan nga kadagatan kag kun may makit-an nga oil spill, gilayon nga ipahibalo sa ila talatapan agud madali nga ma-contain kag indi na maglapta.
Dako man suno diri ang epekto sa marine habitat ang amu nga oil spill.
