Wala nagpatublag ang Philippine Coast Guard (PCG) sa presensiya sang Monster ship sang China nga nakaangkla sa Escoda shoal.
Sa isa ka paghinun-anon, ginpahayag ni PCG spokesperson for the West Philippine Sea Commodore Jay Tarriela nga indi mapahog ang PCG ukon mag-atras kag indi man mamanduan ang BRP Teresa Magbanua nga magbalik sa Palawan kasunod sa sugo sang Presidente kag intensiyon sang PCG Commandant nga ipabilin ang ila nga presensiya sa Escoda shoal.
Una na nga ginpahayag ni Commodore Tarriela sining Biyernes nga igadeploy ang CCG 5901 ukon Monster ship sa Escoda shoal agud pahugon ang PCG 9701 ukon BRP Teresa Magbanua.
Kaangut sini, naghiwat man sang radio challenges ang PCG 9701 ukon BRP Teresa Magbanua sumugod sang mag-abot sa shoal ang nasambit nga barko sang China.
Suno kay Commodore Tarriela nagahiwat ang PCG sang radio challenge sa tion nga nagahimo sang kaduda-duda ang grupo sang China kasubong sang pagdeploy sang rigid-hull inflatable boats.
