ROXAS CITY – Pormal na nga ginpahamtang sa puwesto bilang bag-o nga Provincial Director sang Capiz Police Provincial Office (CPPO) si Colonel Albert Tapulao subong nga adlaw sang Martes, Setyembre 17, 2024.
Ang turnover of command ceremony ang ginpatigayon sa Camp Teodorico C. Apil sa Barangay Lanot, Roxas City.
Ang nasambit nga seremonya ang ginpangunahan ni Police Brigadier General Archival Macala, Deputy Regional Director for Administration sang Police Regional Office 6 (PRO6).
Nahibaluan nga gintal-usan ni Colonel Tapulao sa pwesto si Police Colonel Jerome Afuyog Jr.
Antes nga gin-assign si Colonel Tapulao sa probinsya sang Capiz, nangin anay Chief ini sang Finance Department sa Police Regional Office 6.
Samtang, pagatutukan naman sang bag-o nga pungko nga director sang Capiz Police Provincial Office ang ikaayong lawas sang mga kapulisan sa probinsya sang Capiz.
Dugang pa sini, nagapati ini nga kun maayo ang ikaayong lawas sang kapulisan, mangin maayo man ang dalagan sang paminsaron sang mga ini nga maga-resulta sang mas maayo nga performance sa ila nga trabaho kag responsibilidad.
Sa karon, ang gintal-usan ni Tapulao nga si Afuyog ang gin-assign sa opisina sang Regional Personnel Holding and Accounting Unit (RPHAU).
