ROXAS CITY – Ginpanginwala sang peace consultant sang National Democratic Front of the Philippines (NDFP) Western Visayas Ma. Concepcion ”Ka Concha” Araneta Bocala, nga indi na madayun ang peacetalks.
Sa interview sang Bombo Radyo kay Ka Concha, ginpahayag sini nga wala sang kamatuoran ang ginbuy-an nga pahayag ni Defense Secretary Delfin Lorenzana nga indi na madayun ang hinambalanay pangkatawhayan sa tunga sang GRP panel kag NDFP panel.
Suno kay Ka Concha wala sa posisyon ang nasambit nga opisyal para magpaguwa sang kasubong sini nga pahayag bangud ang representante sang gobyerno sa peacetalks amo si Secretary Silvestre Bello III.
Nagpanindugan man ini nga ba-se sa ginpalab-ot sa ila sang NDFP panel nga madayun ang back channel talks.
Samtang, wala nalikawan ni Ka Concha nga magpaguwa sang kalain sang buot kay President Rodrigo Duterte, bangud sa wala pagtuman sa pila ka mga pasalig sang ini ang nagapangampanya pa lamang kasubong sa pag-release sa tanan nga political prisoner’s nga tobtob sa karon nakabilanggo sa gihapon.
