ROXAS CITY, CAPIZ – Imbestigaran sang Provincial Environment and Natural Resources Office – Capiz ang ginasuspetsahan pulis nga ginatumod nga nagapanag-iya sang van nga nadakpan nga may karga nga iligal nga kahoy sa Barangay Bayuyan, President Roxas, Capiz.
Sa interview sang Bombo Radyo kay Ernest Federiso, Officer in Charge sang PENRO-Capiz, iya ginpahayag nga madugay na nila nabaton ang impormasyon nagikan sa mga pumuluyo nga ginapanag-iyahan sang pulis ang van nga naga-operate sang iligal nga pag-transport sang kahoy.
Suno kay Federiso, halin pa sadtong Oktubre 2024, ginatinguhaan sang mga otoridad nga madakpan ang amo nga van bangud sa pagdala sang mga iligal nga kahoy gikan sa lugar sang Barangay Yating, sa banwa sang Pilar.
Sa una nga engkuwentro, natalupangdan sang PENRO-Capiz Monitoring and Enforcement Section (MES) personnel ang color kag sticker sang van, apang wala indi nadakpan bangud sa pagpalagyo sang mga suspek.
Liwat nga nakit-an ang pareho nga van sang Marso 7, 2025 samtang nagapatrolya ang duha ka forest ranger sa Barangay Carmencita, President Roxas sa diin ginbag-o ang plate number sang salakyan apang napaslawan liwat ang operasyon bangud ginapahayag sa kakulangan sang suporta gikan sa iban nga ahensya kag may impormasyon nga armado ang driver.
Sang Hulyo 8, alas 5:45 sang aga, nakabaton sang impormasyon ang mga tinawo sang PENRO MES sa pinaagi sa isa ka tawag sa telepono nga ang pareho nga van ang liwat nga nagsuklod sa Barangay Yating, Pilar.
Sang Hulyo 20 naman alas 8:45 sang gab-i, nakabaton liwat sang impormasyon ang talatapan nga ang pareho nga van nagsulod liwat sa nasambit nga barangay agud magkarga sang illegal forest products.
Sa ulihi nga operasyon sang mga otoridad kag PENRO-Capiz sang Hulyo 21, 2025, nakumpiskar ang van nga may nagkalain-lain nga plate numbers, kalakip ang isa ka handset radio kag isa ka binangon. Ang mga narekober naman nga kahoy ginakalakipan sang nagkalain-lain nga sahi kasubong sang salong, gmelina, taluto, kag bakan, nga may kabug-usan nga 511 board feet.
Samtang nakapalagyo naman ang driver sang van nga si alyas “Nong-nong,” kaupod ang iya nga helper nga si alyas “Claro”, nga lunsay mga residente sang Barangay Yating.
Gintuad pa sang natungdan nga ginreklamo na nila sa Capiz Provincial Office kag Criminal Investigation Detection Group ang nahanungod sa mga natabo kag naghatag man assurance ang nsambit nga mga ahensya nga batuan ang amo nga iligal nga aktibidad kag nagsulat naman ang mga ini sa National Bureau of Investigation para sa dugang nga imbestigasyon.
Ang apprehension sang mga iligal nga kahoy sandig sa mga probisyon sang Presidential Decree No. 705 (Revised Forestry Code) kag DENR Administrative Order 2022-10.
