Nangnubo sang 33.18% ukon P35-B ang investment approvals sang Philippine Economic Zone Authority (PEZA) sa una nga duha ka bulan sang 2026, sandig sa report sang ahensiya.
Gin-aprubahan sang PEZA ang P35.37 billion nga investment pledges tubtob Pebrero, mas manubo kun ipaanggid sa P52.93 billion nga narekord sa kapareho nga panahon sang 2025. Subong man, ginalauman nga magahatag ang 52 ka mga bag-o kag expansion projects sang $10.44 billion nga exports kag magatuga sang 5,049 ka trabaho.
Suno kay PEZA Director General Tereso Panga, ang pag-apruba sa 52 ka mga bag-o nga proyekto ang nagapakita sang padayon nga diversification sang mga industriya sa ecozones kag pagdabong sang investments sa nagkalain-lain nga rehiyon.
Sa Pebrero lamang, nakarekord ang ahensiya sang P22.50 billion halin sa 34 ka mga bag-o nga proyekto, nagnubo sang 1.23% halin sa P22.78 billion sang Pebrero 2025. Kalakip diri ang tatlo ka dalagku-an nga proyekto sa Bulacan, Pampanga, kag Tarlac nga nagabalor sang P18.367 billion.
Target sang PEZA subong nga tuig ang kabug-usan nga P300 billion nga investments kag 100,000 nga trabaho, nga may South Korea, Indonesia, British Virgin Islands, China, kag Japan bilang nagapanguna nga foreign investors.
