Ginpanginwala sang Philippine Health Insurance Corporation (PhilHealth) ang pagpain sang halos P138 million para sa ila nga Christmas party.
Suno sa state health insurance, ang nasambit nga kantidad ang ginpain para sa pagsaulog sang ila ika-30 nga anibersaryo para sa masunod nga tuig nga sandig sa pag-obserbar sang National Health Insurance Month kada bulan sang Pebrero nga gindeklarar sa gahom sang Proclamation 1400 series of 2007.
Nagatuman man suno diri ang Philhealth sa direktiba sang Malacañang nga himuon nga simple ang selebrasyon sang mga ahensiya sang gobyerno subong nga Christmas season.
Ginhimo sang Philhealth ang pagpaathag bilang pagkontra sa social media post ni health reform advocate Dr. Tony Leachon nga amu ang nag-publish sang isa ka screenshot sang ginapahayag dokumento sang Philhealth nga nagapakita nga yara sa P137,766,032 nga pondo ang ginpain para sa nagkalain-lain nga items kasubong sang mga token, giveaways, commemorative medals kag iban pa.
Sa una nga post ni Dr. Leachon sang damlag lang, ginpahayag sini nga ang amu nga dokumento ang para sa Christmas party, bagay nga gilayon naman gin-athag sang Philhealth.
Sang ulihi, gin-islan ni Dr. Leachon ang iya nga post kag ginpahayag nga ang pondo ang para sa anibersaryo sang Philhealth apang, ginsiling sini nga magarbo ini sa gihapon bangud sa mga problema pinansyal nga ginapangatubang sang mga pumuluyo nga Pilipino kag zero subsidy para sa Philhealth sa 2025 national budget, dugang pa ang pagsaylo sang halos P90 billion nga pondo sang Philhealth sa National Treasury.
