JAPAN- Wala pa sang may nareport nga Pilipino nga napatay ang Philippine Embassy sa Japan kasunod sang natabo nga 7.6 magnitude nga linog sa Japan sang Disyembre 8, 2025.
Sa interview sang Bombo Radyo kay Bombo Josel Letrero Palma, Bombo International Samurai Correspondent sa Japan, iya ginpahayag nga padayon nga nagapakig-angut kag monitor ang Philippine Embassy sa mga Pinoy sa Japan.
Suno kay Palma, sandig sa report sang Japan Meteorological Agency, ang epicenter sang linog ang yara sa kalalawran, mga 80 kilometro halin sa baybayon sang Aomori Prefecture, kag may kadalumon nga ginabulubanta yara sa 50 kilometro.
Gilayon naman nga nagpagwa sang tsunami warning ang Japan Meteorological Agency para sa mga coastal areas sang Hokkaido, Aomori, kag Iwate.
Pahayag niya, bangud sa natabo nga linog kag pagpamahog sang tsunami, linibo nga mga pumuluyo ang nagapabilin sa subong sa mga evacuation centers.
Samtang, nagdangat naman sa 33 ka mga indibidwal ang nareport nga pilason sandig sa 5PM, December 9 data sang mga otoridad. Ginreport man nga may nagkalaguba nga mga imprastruktura, mga nabuka nga mga bubog sang bintana, kag may pila ka mga balay nga naguba.
Nagapadayon sa subong ang pag-consolidate sang gobyerno sang Japan sa mga naapektuhan sang linog kag nagapadayon man ang ila ng relief operations samtang wala pa sang may nareport nga napatay sa amo nga linog. Nagpatigayon naman sang mga pag-inspeksyon sa mga critical facilities kasubong sang nuclear plant, kuryente, kag iban pa nga mga imprastruktura.
Dugang pa sang natungdan, nagapadayon man ang panawagan sang Philippine Embassy sa Japan sa mga Pilipino nga magsunod sa mga patakaran nga ginapatuman sa subong sang mga otoridad agud masiguro ang kaluwasan sangf tagsa-tagsa.
Nagapanawagan naman ang natungdan sa mga Pilipino subong sa Pilipinas nga nagpalab-ot sang mga pagkabalaka sa ila nga luwas sila sa Japan, apang sa gihapon, padayon nga ginamonitor sang mga otoridad kag natungdan ang ila nga sitwasyon.
Interviewed by Bombo Francis Biñas
