Ginapanindugan sang Philippine Navy nga wala nagapaapekto ang mga soldado nga Pilipino nga nadestino sa West Philippine Sea sa pihak sang nagalala nga word war sa tunga sang Pilipinas kag China.
Suno kay Navy spokesperson Rear Admiral Roy Vincent Trinidad, nagapabilin nga intact kag mataas ang morale sang tropa sang gobyerno bangud naintindihan nila ang ila mandato kag ang matuod nga sitwasyon sa kadagatan.
Dugang pa sang opisyal nga bangud literal nga yara sa frontline ang mga suldado, mas madalom ang ila paghangop sa nasambit nga isyu.
Sa pagkamatuod, ginakadlawan nalang nila ang sitwasyon kag wala sila nagapaapekto sa gahod sang pulitika.
Ginhatagan man pagtamod ni Trinidad nga ang kaaway indi mga kapareho nga Pilipino kundi ang mga dumuluong nga nagapasilabot sa teritoryo sang pungsod.
Ang nasambit nga pahayag ang kasunod sang pagbinaisay sa tunga sang Chinese Embassy kag ni PCG spokesperson Commodore Jay Tarriela, subong man ang pagpasar sang Senado sang resolution nga nagapakamalaut sa mga insulto sang Beijing sa mga opisyal sang Pilipinas.
Samtang, padayon naman ang modernisasyon kag pagpatigayon sang pagpatrolya sang Navy sa ginabaisan nga kadagatan.
