Nagdangat na sa 200 ka deboto ang nakabaton sang medikal nga atensyon gikan sa Department of Health sa tunga sang nagapadayon nga prusisyon sang Poong Hesus Nazareno sa Manila subong nga adlaw sang Biyernes, Enero 9, 2026.
Suno kay Dr. Christian Ramos, head sang Department of Health -Health Emergency Response Team, mas madamo subong ang mga pasyente nga gindala sa Department of Health medical tents tungod sang trauma.
Kadam-an sini ang may mga pilas pareho sang gasgas kag lagob sa nagkalain-lain nga parte sang ila nga lawas.
Suno pa kay Dr. Ramos, may isa ka pasyente nga natapakan sang kariton sang andas sa iya wala nga tiil nga nagtuga sang pagkau-utod sang iyasini tudlo sa tiil.
May ara man pila ka deboto nga ginkinahanglan na nga dal-on sa ospital lakip na ang isa ka 15 anyos nga naipit sa tunga sang prusisyon kag nakaeksperyensya sang anxiety reaction.
Samtang, may 20 ka Department of Health emergency stations nga nagapahamtang sa ruta sang andas kun sa diin nakabalhag sang hinali nga pagdamo sang mga nasamaran nga deboto sa Area 2 sang banda alas-7:00 sang aga.
Gilayon man nga gindala ang mga nasamaran nga deboto sa medical tent sang Department of Health sa Ayala bridge, nga kabahin sang ruta sang andas.
Sa subong, padayon ang collaboration sang Department of Health kag Philippine Red Cross sa paghatag sang medical aid sa mga deboto sa tunga sang nagapadayon nga Traslacion.
