ROXAS CITY – Lakot ang reaksyon sang pila ka mga employer sa probinsya, matapos nga magadugang ang mga ini sa pa-suweldo sa ila mga empleyado.
Matandaan nga nagpaguwa sang pahayag ang Department of Labor and Employment (DOLE) kahapon nga adlaw nga gin-aprubahan na sang National Wages and Productivity Commission (NWPC) ang duha ka wage order nga nagapadugang sang daily minimum wage sang mga workers sa Rehiyon 6.
Sa interview sang Bombo Radyo kay Ms. Amy Judicpa, OIC sang DOLE-Capiz, ginpahayag sini nga mixed reaction ang mga employer sa Capiz, may yara sang bukas sa wage increase apang himuon ini nga 3 to 4% gid lamang nga pagtaas, ang iban luyag nga amat-amaton ang pag-implementar sa duha ka tranche sini nga tuig agud indi tuman ka bug-at sa ila kag ang iban ang indi gid luyag sa wage increase.
Apang, bangud nadesisyunan na kag naaprubahan na ini sang Komisyon, dapat ini nga sundon sang mga employer kag suno kay Judicpa nga wala paman sang employer nga wala nagsunod sa nauna nga wage order sa Capiz.
Mahimo sa gihapon nga maka-file sang exemption ang employer apang may proseso kag rekisitos nga pagasundon.
Matandaan nga duha ka wage order ang ginpapasar sang NWPC sa Western Visayas, isa diri ang para sa mga kabulig sa balay kag sa mga workers, makabaton sang P450 nga minimum wage kada adlaw ang mga trabahante sa non-agricultural sector nga may masobra sa napulo ka empleyado; P420 naman sa mga may napulo panubo nga empleyado kag P410 sa agricultural sector.
Ginalauman nga maga-epektibo ini sa nauna nga semana sang Hunyo, 2022.
