ROXAS CITY – Pila ka mga local government officials sa Western Visayas ang natumod nga nagasuporta sa rebelde nga New People’s Army (NPA).
Ini ang ginkompirmar mismo ni Captain Cenon Pancito III, tagpamaba sang 3rd Infantry Division-Philippine Army sa exclusive interview sang Bombo Radyo.
Suno diri nga sa karon indi pa nila mapaguwa ang listahan sang nasambit nga mga opisyal bangud nagapadayon pa ang ila nga validation.
Apang ginkompirmar sini nga barangay officials ang pinakamanubo nga posisyon nga nagasuporta sa rebelde nga grupo sa rehiyon kag may yara man sang mga alkalde.
Sa karon suno sa iya nagapadayon ang ila nga koordinasyon sa Philippine National Police (PNP) kag iban pa nga law enforcement agencies para sa dugang nga ‘information gathering’.
Nagpaandam man ini sa mga opisyal nga untatan na ang paghatag sang suporta sa mga rebelde bangud kun magapadayon ang mga ini, posible sila mapasakaan sang kaso bangud makonsiderar ini nga akto sang terorismo.
Ginpasiguro man sang militar nga matapna ang kaangtanan sang mga pulitiko sa mga rebelde.
