ROXAS CITY – Ginkompirmar ni Sigma Vice Mayor Stephen Alayon nga may pila ka mga residente sang Barangay Acbo ang nagpatigayon sang protesta sa munisipyo sang nasambit nga banwa.
Ini may kaangtanan sa plano sang gobyerno probinsyal nga Ecological Solid Waste Management sa nasambit nga lugar.
Sa interview sang Bombo Radyo kay Alayon nga nasaad sa ginsumiter sa ila nga dokumento amo ang Barangay Consultation.
Ginpahayag sang nasambit nga presiding officer nga wala pa natapos sang Sangguniang Bayan ang pagtalakay kag pag-aprubar sa nasambit nga plano.
Suno kay Alayon nga indi pa mabal-an subong kun ano ang mangin desisyon sang lokal nga gobyerno sang Sigma.
Mahibaluan nga halos 300 ka mga pumuluyo ang indi pabor sa nasambit nga plano.
Samtang, nagpasalig naman ini nga respetuhon man nila kun ano ang mangin desisyon sang kadam-an partikular na ang committee of the whole.
Ini bangud magapaidalom pa ini sa maid-id nga mga proseso sa LGU sang amo nga banwa.
Nagpaathag naman si Alayon sa mga pumuluyo nga tubtob nga may yara sa gihapon sang naga-oponer ukon nagapamatuk indi sa gihapon madayon ang nasambit nga plano.
Dugang pa sini nga ginaproteksyunan lamang nila ang ikaayong lawas san kadam-an.
