ROXAS CITY – Halos indi pabor ang mga residente sa siyudad sang Roxas nga magpabakuna sang COVID-19 vaccine nga natalana mag-abot sa Pilipinas subong nga tuig.
Sa pagpakig-angut sang Bombo Radyo News Team kadam-an sa ila ang nahadlok sa mangin epekto sang bakuha sa ila lawas.
Suno kay alyas Nilo nga wala ini sang plano nga magpabakuna sang COVID-19 vaccine bangud nahadlok ini sa mangin epekto sa ulihi sa iya nga lawas.
Ginpahayag sini nga indi naman kinahanglan ang bakuna kun masarangan lamang sini nga protektahan ang iya lawas batuk sa nasambit nga balatian.
Ginpahayag naman ni alyas Jessa nga indi man sini luyag nga magpabakuna bangud nadudla na ini sa una nga balita sang una natuhoy man sa pagpabakuna sa diin nag resulta sang pagkamatay sang pila ka mga Filipino.
Suno kay alyas Jessa apisar nga may COVID-19 vaccine na ang probinsya wala ini sang plano nga magpabakuna bangud wala ini nakahibalo sa mangin epekto sini sa iya nga lawas sa ulihi.
Mahibaluan nga ginalaoman subong nga tuig 2021 magaabot diri sa Pilipinas ang mga bakuna batuk sa COVID-19 nagikan sa mga kapungsoran nga mahimo gamiton sang mga Filipino.
