Pabor ang pila ka mga senador nga sugdan ang impeachment trial batok kay Vice President Sara Duterte sa Agosto 4 ukon isa ka semana matapos ang State of the Nation Address (SONA) ni Presidente Ferdinand Marcos Jr.
Suno kay Senador Joel Villanueva, may mga senador nga may mga impormal nga pag-istoryahanay kay Senate President Francis “Chiz” Escudero kon san-o mahimo nga mag-convene ang Senado bilang impeachment court.
Ginsiling sini nga pat-od gid nga pamangkuton ni Escudero ang mga senador nahanungod sini kag para kay Villanueva, nagpasugot ini nga sugdan ang trial isa ka semana matapos ang SONA sang presidente.
Paathag sang senador, dapat una nila ihanda ang ila kaugalingon sa pagpili sang lider sang 20th Congress, committee chairmanship, kag amo man ang himuon sang ila counterpart sa Chamber.
Apang ginklaro ni Villanueva nga wala pa sang pinal nga desisyon angut sa nasambit nga proposal apang apat tubtub anum na ka mga senador ang nagpabutyag sang ila pag-ugyon nga mag-convene sa Agosto 4.
Madumduman nga ginpaguwa ni Escudero ang proposed calendar para sa palaabuton nga impeachment proceedings batuk kay VP Sara.
Base sa nasambit nga kalendaryo, natalana sa Hulyo 29 ang pagsumpa sang mga bag-o napilian nga senador-judges, samtang magasugod naman ang trial sa masunod nga adlaw, Hulyo 30.
Suno kay Escudero, ang target sang Senado amo ang pagsunod sa schedule, kag bangud ang magtimbang nga bahin—ang prosekusyon kag depensa—may bastante nga tion sa paghanda, ang anuman nga pagtinguha nga pahinayon ang proseso indi pag-itugot.
