Pilas sa guya ang naangkon sang 34-anyos nga lalaki matapos ginlampusan sang tagad sa Barangay Linatiran, Panay Capiz.
Ginkilala ang biktima kay alyas Arjay, 35-anyos samtang ang suspek naman ang ginkilala kay alyas James, 43-anyos kag lunsay mga residente sang nasambit nga lugar.
Sa interview sang Bombo Radyo kay PSSG Ryan Barrera, imbestigador sang Panay MPS, ginapahayag nga samtang nagapahuway ang biktima sa ila puluy-an, nabugtawan ini sa pagsinggit sang suspek nga yara sa impluwensya sang makahulubog nga ilimnon nga kaangay naaakig ini sa biktima bangud nga wala ini nagabulig sa pag kay-o sa ila bangka.
Dugang pa ni Barrera, nagguwa ang biktima sang balay ang agud nga komprontahon kun tani ang suspek apang may nagluntad nga indi pag-intindihanay sa tunga sang mga ini rason nga nagkuha sang tagad ang suspek kag ginlampos ini sa biktima.
Nag-angkon sang pilas sa guya ang biktima nga madasig naman nga gindapatan sang pauna nga pag bulong antes ginpadanga sa isa ka pribado nga ospital.
Samtang sa karon, padayon pa nga ginaayam sang mga kapulisan ang nasambit nga suspetsado nga madasig nga nakapalagyo matapos nakumiter ang insidente.
