Nakakuha sang three medal chances sa Paris Olympics si Pinoy Gymnast Carlos Yulo matapos ini nga makasulod sa individual all-around, floor exercise, kag vault finals kasunod sang pagtakop sang men’s artistic gymnastics qualification kaina ala una sang kaaganhon.
Gin-ako ni Yulo nga madamo pa ini sang mahimo sa iya performance sa qualification apng mas ginpili sini nga mag-play safe agud makalikaw sa injury samtang ginahimo sa gihapon ang bastante nga bid nga malab-ot ang all-around finals.
Kalakip si Yulo sa una nga anom nga ginkumpirmar sang Paris Olympics website nga nag-abante sa vault apparatus finals.
Mahibaluan nga wala pa sang Pilipino nga atleta ang nakalab-ot sa madamo nga finals sa Olympics.
Dako ang posibilidad nga ma-sweep ni Yulo ang tatlo ka disiplina para sa gold medal.
Nagpangaduwa ang 24-anyos nga si Yulo matapos nga nag-iskor sang 14.766 sa qualification round sang floor exercise, ang event/apparatus kun sa diin siya ang anay world champion sadtong 2019, kag siya man ang sa karon nga three-time Asian champion.
Ang una nga shot ni Yulo sa Olympic medal amo sa palaabuton nga men’s all-around final sa Hulyo 30.
Nakuha sini ang ika-siyam nga puwesto kag nakatipon sang kabug-usan nga iskor nga 83.631 sa anom nga apparatuses sa qualification.
Samtang, Nakuha ni Jake Jarman sang Great Britan ang una nga puwesto sa qualification sang floor exercise sa iskor nga 14.966.
Makaatubang sang reigning champion Artem Dolgopyat sang Israel si Yulo para sa gold matapos ang pang pito nga pwesto sa qualification.
Nagpanguna naman si Zhang Boheng sang China sa qualification sa all-around sa score nga 88.597, samtang nagpangatlo ang defending champion nga si Daike Hashimoto sang Japan matapos makapagkit sang 85.064.
Nakuha naman ni Yulo ang ika-19 nga pwesto sa parallel bars (14.533), ika-27 sa horizontal bar (13.466), ika-40 sa pommel horse (13.066), kag ika-49 sa rings (13.000).
