ROXAS CITY, CAPIZ- Gin-athag sang pamanuan sang Pagkakaisa ng mga Samahan ng Tsuper at Opereytor Nationwide (PISTON) Capiz nga indi sila magpatigayon sang transport strike sa probinsya.
Sa interview sang Bombo Radyo kay Mr. Joebert Carandang, President sang Pagkakaisa ng mga Samahan ng Tsuper at Opereytor Nationwide (PISTON) Capiz Chapter, iya ginpahayag nga imbes transport strike, magapatigayon lang ang PISTON Head Office sang Ticket Rally sa atubang sang Land Transportation Franchising and Regulatory Board (LTFRB) Office kag Land Transportation Office (LTO) sa Manila.
Suno kay Carandang, bangud sa kapi-ot sang sitwasyon subong, ilabi na kag kinahanglan sang mga tawo ang kwarta bangud nga holiday season, magapadayon ang operasyon sang mga jeepney drivers kag operators sa probinsya sang Capiz.
Pahayag niya, nagasuporta sila sa lihok sang transport group nga Manibela sa diin suno sa iya, kasubong man sang mga panawagan sang Manibela ang ila nga ginasinggitan.
Una na diri ang panawagan nga i-release sang LTFRB ang ginpang-impound nga mga units sang jeepney, ikaduha aamo ang pagbuyagyag sang pasobra nga pagmulta sa mga jeepney operators kag drivers, sunod amo ang pagdumili sa Jeepney Modernization Program kag ginapanawagan man nila ang mga naulamid nga opisyal sa korapsyon sa pungsod nga sabton ang kinahanglan nga sabton sa publiko.
Nahibaluan nga natalana sa Disyembre 9 tubtob 11, 2025 ang pagpatigayon sang transport strike sang grupo nga Manibela.
Nagapanawagan naman si Carandang sa mga natungdan nga kuntani pamatian ang ila nga mga panawagan sa bahin sang transport sector.
Interviewed by Bombo Francis Biñas
