ROXAS CITY – Pormal na nga ginbuksan sa publiko ang “Places of Memory, Places of Heart: Plazas in the Philippines” exhibit nga ginpresentar kag ginpamunuan ni Architect Paulo G. Alcazaren nga isa ka award-winning landscape architect diri sa Pilipinas subong nga adlaw sa Ang Panublion Museum, Roxas City.
Ginpresentar ang kapin 16 ka mga laragway sang mga nanari-sari nga Plaza diri sa Pilipinas kag subong man ang ila sini nga architectural plan.
Suno kay ‘Ang Panublion Museum’ Director Cheryl Anne del Rosario, tinutuyo sang amu nga exhibit nga maipakita sa publiko ang importansya sang mga Plaza sa pang-adlaw-adlaw nga pagpangabuhi.
Dugang pa sini, ang amu nga exhibit ang magapatigayon sumugod subong nga adlaw Setyembre 28, tubtob Oktubre 30, 2024.
Mahibaluan, nga ang amu nga opening ceremony sang exhibit ang kabahin sang nagapadayon nga aktibidad nga Regional Museums and Heritage Summit 2024 sa syudad sang Roxas.
Madumduman nga kahapon nga adlaw ang imbukada sang nasambit nga aktibidad, nga ginpatigayon sa Gerry Roxas Foundation, Brgy Dayao sining syudad, kung sa diin sanday Jorell Legaspi, isa ka resource speaker ang nag-lecture sang topic nga :”Museums as Community Place makers and Keepers of Memories”, dugang man nga lecture sang isa pa ka resource speaker nga si Architect Carmen Betina Silao- Bulaong nga may topic nga:”Promoting conservation and Preventive Maintenance within your communities” nga may yara man sang Question and Answer portion kag Toym Leon Imao sang lecture nga “When Culture, History and Art are Accessible Outdoors”. Magatakop naman ang nasambit nga aktibidad, buwas nga adlaw sang Dominggo, Setyembre 29, 2024.
